ICO e ka përmbushur misionin

Pas njoftimit të Zyrës Civile Ndërkombëtare (ICO) për mbylljen e
zyrave të saj në qytetet rajonale të Kosovës, Pejë, Prizren e Gjilan,
janë shtuar zërat që kërkojnë largimin e kësaj organizate në tërësi.
Puna e ICO-së, si mbikëqyrëse e pavarësisë së Kosovës dhe përkrahëse e
integrimit të saj, shihet si e panevojshme për të vazhduar më tutje
prezencën në vend.Një burim diplomatik ka thënë se deri në
shtator të këtij viti, ka gjasa që Grupi Drejtues Ndërkombëtar (GDN) të
marrë një vendim për largimin e tërësishëm të ICO-së.
“ICO e ka përmbushur misionin e saj, pavarësisht problemeve dhe
sfidave apo edhe pengesave që i kanë dalë gjatë rrugës. Pavarësisht
çfarë thuhet për dështimin e saj, përveçse në veri, ICO në pjesët tjera
të Kosovës ka bërë punën e saj, andaj dhe pas mbylljes së zyrave
rajonale, deri në shtator do të merret vendim edhe për mbylljen qendrore
të saj në Prishtinë, e pastaj edhe në Mitrovicë”, tha për “Zërin” ky
burim diplomatik.
Por këtë largim, të tjerët e shohin si pasojë e dështimit. Vetëm pak
ditë më parë, ishte vetë Andrea Lorenzo Capussela, ish- udhëheqës i
Njësisë për Ekonomi në ICO, i cili tha se koha e kësaj organizate në
Kosovë ka mbaruar. “ICO duhet të largohet. Besoj se në fillim ka qenë e
dobishme duke i ndihmuar Kosovës në hartimin e ligjeve, por kur erdhi
koha për të pritur zbatimin e ligjeve, atëherë ICO është dëshmuar e
dobët”, ka thënë Capussela.
Por derisa Qeveria Kosovës parasheh një kohë se kur mund të
përfundojë i tërë ky mision, ICO në anën tjetër thotë se një gjë e tillë
ende nuk mund të përcaktohet.
Andy McGuffi e, zëdhënës i ICO-së, thotë se është GDN që në një të ardhme
do të vendosë për fundin e mbikëqyrjes së pavarësisë së Kosovës.
“Detyra të rëndësishme kanë mbetur pa u përfunduar, prandaj nuk është e
mundur që të vendoset një afat për përfundimin e këtij misioni”. /Telegrafi/