Kërkohet përgatitje maksimale për Misionin vlerësues

Kryeministri i vendit, Hashim Thaçi ka bërë të ditur të premten se javën e ardhshme Misioni vlerësues i Komisionit Evropian do të qëndrojë në Kosovë, për të vlerësuar progresin në kuadër të procesit të riintegrimit të personave të riatdhesuar si në nivel lokal, ashtu edhe në atë qendror, e që ka rëndësi në hapjen e procesit të liberalizimit të vizave.

Në takim me kryetarët e komunave të Republikës së Kosovës, Thaçi tha se ekspertë nga KE-ja dhe shtetet anëtare të BE-së do të zhvillojnë takime me të gjithë akterët relevantë në këtë proces.

“...Duke u bazuar në informacionin që kemi në dispozicion, ky mision vëmendje të veçantë do t’i kushtojë vlerësimit të përmbushjes së obligimeve që dalin nga procesi i riintegrimit ne nivel komunal... Është jashtëzakonisht inkurajues fakti që kemi një përkushtim të përbashkët të të gjitha strukturave dhe organeve të institucioneve të Republikës së Kosovës nga niveli qendror deri në atë lokal. Kemi një unitet të qëndrueshëm funksional dhe efektiv për të ardhmen evropiane të Republikës së Kosovës edhe në këtë proces të ndjeshëm të hapjes së perspektivës së sigurt dhe realizimit të hapave konkret edhe në raport nga Komisioni Evropian dhe Bashkimi Evropian për Kosovën”, tha ai.

Sipas kryeministrit, Qeveria e Republikës së Kosovës është e vetëdijshme për progresin që është shënuar në nivel lokal, sidomos gjatë këtij viti, kur është shënuar përmirësim në mobilizimin e komunave për tu marrë me riintegrim, si dhe është avancuar komunikimi brenda komunal dhe komunikimi në nivel qendror.

“Në kuadër të përgatitjeve, ju lusim, që në rast vizite nga ekspertët e përmendur, të siguroni bashkëpunimin maksimal me ta dhe të ndani gjithë informacionin që keni në dispozicion për të siguruar kështu që, progresi i arritur do të reflektohet edhe në raportimin vlerësues që ata do të bëjnë”, u shpreh Thaçi. /Telegrafi/