Hasani: EULEX-i zbaton misionin e Serbisë

Nait Hasani, deputet nga radhët e Partisë Demokratike të Kosovës ka akuzuar të premten EULEX-in se nuk ka ardhur në Kosovë për të vënë rend dhe ligj, por të zbatojë misionin që ka Serbia për Kosovën. Hasani kërkoi të formohet një grup i deputetëve dhe i njëjti të shkoi në Parlamentin Evropian për të denoncuar veprimtarinë e EULEX-it në Kosovë.
Deputeti nga radhët e PDK-së, Nait Hasani i cili ka iniciuar pikën e rendit të ditës për siguri dhe rend në vend, tha se EULEX-i po i përdhosë vlerat kombëtare që kanë shqiptarët dhe po mundohet ta degradojë edhe luftën e Ushtrisë Çlirimtare të Kosovës.

Sipas Hasanit, arrestimi i pjesëtareve të UÇK-së nga EULEX është bërë me urdhër të shërbimeve sekretare serbe. Ai tha se pjesëtarë të shërbimit sekret serb janë të punësuar në EULEX dhe në Policinë e Kosovës.

EULEX, sipas Hasanit po vepron me dy standarde të dyfishta, pasi sipas tij në njërën anë arreston shqiptarë dhe fillon hetime ndaj tyre pa kurrfarë baze, ndërsa në anën tjetër nuk ndërmerr asnjë aksion për të arrestuar dhe shpërbërë bandat kriminale në veri.

Për këtë deputeti i PDK-së ka kërkuar nga institucionet e vendit që të marrë vetë në duar sistemin e drejtësisë dhe sigurisë në vend, ndërkohë EULEX sipas tij duhet të ketë vetëm rol këshillëdhënës. Në të kundërtën ky mision, sipas Hasanit është i tepërt në Kosovë dhe si i tillë duhet të largohet.

Në fjalimin e tij para deputetëve Hasani kërkoi të formohet një grup i deputetëve dhe i njëjti të shkoi në Parlamentin Evropian për të denoncuar veprimtarinë e EULEX-it në Kosovë.

Debati për parlamentar për sigurinë dhe sundimin e ligjit është duke vazhduar në Kuvendin e Kosovës, duke theksuar kështu brishtësinë në veri të vendit. /Telegrafi/