Reforma zgjedhore i delegohet OSBE-së

Komisioni Parlamentar për amendamentimin e Ligjit për zgjedhjet e përgjithshme ia ka deleguar punët me të cilat e ka ngarkuar Kuvendi i Kosovës, një grupi punues që do të menaxhohet nga OSBE-ja. Pjesën më të madhe të punës të reformës zgjedhore pritet ta bëjë ky grup 24-anëtarësh, i cili është krijuar me vendim të vetë komisionit.

Duke e pranuar propozimin e OSBE-së për krijimin e Grupit punues për reformimin e Ligjit përkatës, kryetari i Komisionit, Haki Demolli, ka thënë se “qëllimi i krijimit i grupit punues është që t’i ndihmojë Komisionit me propozime të ndryshme rreth amendamentimit të legjislacionit për zgjedhjet”.

Sipas Demollit, objektivi i këtij grupi punues është që të sigurojë se legjislacioni i ndryshuar do të jetë në përputhje me standardet ndërkombëtare dhe, sipas Demollit, në kuadër të këtij grupi do të marrë pjesë edhe shoqëria civile, përfaqësues të partive politike dhe të komuniteteve të Kosovës.

Ndonëse angazhimin më të madh në reformën zgjedhore pritet ta ketë grupi punues, të cilin OSBE-ja menjëherë ka planifikuar ta dërgojë në Durrës për t’ia nisur punës, Demolli është shprehur se megjithëkëtë Komisioni parlamentar, nuk është shkrirë dhe se do të vazhdojë t’i kryejë detyrat.

“Komisioni nuk është shkrirë, sepse procesi i vendimmarrjes mbetet tek komisioni parlamentar. Nuk është marrje e kompetencave por grupi punues ka një ekspertizë më të madhe. Për shembull, nëse ne kemi nevojë për të ditur se cili sistem do të aplikohet në Kosovë atëherë grupi punues mund të dalë me disa propozime dhe ne pastaj do të vendosim se cili propozim është më i miri”, ka deklaruar Demolli.

Ai ka bërë me dije se anëtarët e Komisionit do të kenë të drejtë t’i dërgojnë ekspertët përkatës në mbledhjet e grupit punues në të cilin gjithashtu është i obliguar që të marrë pjesë edhe vetë kryetari i Komisionit, Haki Demolli, i cili ka thënë se “nuk dihet ende nëse do të shkohet me ligj të ri apo vetëm me amendamentim të tij. Por nëse shkohet veç me ndryshim të pjesshëm amendamentet duhet të jenë gati deri në janar të vitit të ardhshëm”.

Por draftin e parë të ligjit nuk pritet ta bëjë komisioni i mandatuar nga Kuvendi i Kosovës, mirëpo Grupi punues, ka shpjeguar kryetarja e KQZ-së, Valdete Daka, e cila njëherësh e kryeson edhe Grupin punues. /Koha/Telegrafi/