Turqia zgjodhi Lamberto Zannierin në krye të OSBE-së

Shefi i deritashëm i UNMIK-ut në Kosovë, Lamberto Zannieri, ia ka pa hairin Turqisë. Diplomati italian është zgjedhur në krye të Organizatës për Siguri dhe Bashkëpunim në Evropë, në postin e sekretarit të përgjithshëm, vetëm për shkak se Turqia, e vetmuar, kishte bllokuar zgjedhjen në këtë post të kandidates austriake.

Ish-ministrja e Jashtme e Austrisë, Ursula Plasnik, ka qenë kandidatja më e përshtatshme dhe ka fituar mbështetjen e fuqishme për t’u bërë sekretare e përgjithshme e OSBE-së. Por në zgjedhjen e saj vuri veto Turqia për shkak të deklaratave të mëparshme të zonjës Plasnik kundër anëtarësimit të Turqisë në BE. Këtë e kanë thënë disa burime diplomatike të shteteve perëndimore duke shprehur keqardhje për sjelljen e Turqisë dhe duke shtuar se kjo në mënyrë indirekte mund të ndikojë edhe më shumë në raportet e Turqisë me disa vende të Bashkimit Evropian.

Zannieri në Kosovë ka udhëhequr UNMIK-un shumë më gjatë sesa që mendohej kur në vitin 2008 ishte emëruar në këtë post nga sekretari i përgjithshëm i OKB-së. Megjithëkëtë pakkush e di se çfarë bënte saktësisht në ditën e tij të punës Zannieri, pos shkrimit të letrave medieve, KFOR-it dhe diplomatëve, apo duke marrë pjesë në takime ndërkombëtare ku ftohej Kosova.

Në takime të tilla Zannier duhej të ulej pranë përfaqësuesve të institucioneve të Kosovës dhe të fliste para tyre. Këto kanë qenë kushte që i parashtronte Serbia për të marrë pjesë edhe ajo dhe këto kushte gjithmonë janë respektuar nga ndërkombëtarët dhe janë pranuar nga Qeveria e Kosovës, raporton Koha Ditore.

Diplomatët thonë se Zannier do të merret me Kosovën edhe në cilësinë e re, sepse OSBE-ja është ende e pranishme në Kosovë.

Por askush nuk di se kush do ta pasojë atë në postin e UNMIK-ut dhe shumica e bashkëbiseduesve të “Kohës Ditore” pohojnë se “do të ishte më së miri që OKB të mos emëronte fare pasardhës të Zannierit dhe në këtë mënyrë heshtur të përmbyllet misioni i UNMIK-ut“. Por pritet që Serbia, përmes Rusisë, të kërkojë që doemos në Kosovë të ketë prani të UNMIK-ut sa për të lënë përshtypjen se Kosova nuk është shtet ndërkombëtarisht i pranuar. /Telegrafi/