Hoxhaj ngushëllon familjen e Otto von Habsburg

Në mesin e shumë personaliteteve nga Gjermania dhe shtete tjera
të Evropës dhe botës, ministri i Punëve të Jashtme i Republikës së
Kosovës, Enver Hoxhaj ka marrë sot pjesë në tubimin komemorativ të
pinjollit të familjes së fundit perandorake austro-hungareze, Otto von
Habsburg.Me këtë rast, ministri Hoxhaj në emër të
institucioneve dhe qytetarëve të Republikës së Kosovës ka ngushëlluar
familjen von Habsburg, duke thënë se populli i Kosovës bashkëndjen
dhembjen e saj.
Ministri Hoxhaj ka vlerësuar lartë figurën e Otto von Habsburg, i
cili ishte një zëdhënës i vuajtjeve të qytetarëve të Kosovës në vitet e
90-ta. “Otto von Habsburg ka qenë një mik i madh i Kosovës. Në kohë
shumë të vështira ka përcjell mesazhin për lirinë e qytetarëve të
Kosovës. Ai ishte zëdhënës i fuqishëm i gjendjes së vështirë të Kosovës.
Më vonë von Habsburg u bë mbrojtës i madh idesë së pavarësisë sonë”, ka
thënë Hoxhaj.
Ministri Hoxhaj ka shtuar se Otto von Habsburg si askush tjetër ka
personifikuar historinë e Bashkimit Evropian dhe ka luftuar për
demokraci dhe lirinë e popujve të Ballkanit.
Otto von Habsburg ndërroi jetë më 4 korrik në “Villa Austria” në
Pocking am Starnberger See në Bavari të Gjermanisë. Ai ishte djali i
madh i arqidukës Karl, perandorit të mëvonshëm austriak, mbretit
hungarez dhe arqidukeshës Zita, e lindur Bourbon-Parma. /Telegrafi/