Nenad Canak: Serbia udhëhiqet nga mitomanët dhe kuazipatriotët

Kryetari i Ligës Socialdemorate të Vojvodinës (LSV) dhe deputet i kuvendit serb, Nenad Canak, ka thënë se e ka të paqartë dilemën rreth zgjedhjes mes Kosovës dhe BE-së. Sipas tij, është e rrezikshme edhe ideja e ndarjes së Kosovë, sepse do të ishte “shkaktar i proceseve të rrezikshme në Maqedoni, Mal të Zi, e edhe më gjerë.
“Nuk po e kuptoj çfarë zgjedhje është kjo, çka ka me u zgjedh!? Sepse, kur flasim për BE kjo nënkupton një varg detyrimesh që marrim, por edhe mundësinë që me kusht që për këtë të ekzistoj vullneti politik, të shpejtohet zhvillimi i Serbisë dhe zgjidhja e shumë mosmarrëveshjeve në Ballkanin juglindor. Në anën tjetër, kur përmendet heqja dorë nga Kosovë, duhet t’ju kujtojë se në këtë moment Beogradi nuk ka kurrfarë pushteti në Kosovë, e as që atje zbatohen ligjet e Serbisë. Prandaj, nuk e di se çka nënkupton tërheqja. Nga çka? Nuk mendoj se këtu mund të ketë ndonjë heqje dore”, ka thënë Canak për ditoren e Novi Sadit, “Dnevnik”.

Lideri i LSV-së edhe më tutje mendon se rreth Kosovës luhet lojë kuazipatriotike që sillet rreth formës e jo përmbajtjes dhe e cila shpie “në riciklimin e mallkimit të Lazarit dhe miteve tjera historike”.

“Nëse me rastin e hyrjes së Serbisë dhe Kosovës në BE, standardet duhet të jenë të njëjta dhe kufijtë nuk duhet të ekzistojnë, shtrohet pyetja se a nuk është kjo më e mira për qytetarët e Serbisë dhe të Kosovës. Prandaj procesi i kyçjes në BE duhet të përshpejtohet që ky problem të zgjidhet”.

Ai thotë se kjo zgjedhje nuk bëhet sipas masave të mitomanëve e as atyre të cilët në vitet ’90 të shekullit të kaluar ishin “dhurues bujar të gjakut të huaj”, e as sipas kuazipatriotëve të cilët patriotizmin e tyre e kanë paguar mirë me derivate dhe mallra të akcizës. /Telegrafi/