Shala: Tema e veriut është hapur politikisht

Çështja e veriut është politizuar, por Kosova duhet t’i ikë rrezikut të opsionit Ahtisaari plus apo statusit të veçantë për këtë pjesë, ka deklaruar Blerim Shala, nënkryetar i parë i Aleancës për Ardhmërinë e Kosovës. Sipas tij, çdo status i veçantë për veriun do ta bënte shtetin e Kosovës jo funksional.
“Mendoj se tendenca është që do të ketë një dakordim sa i përket vulave doganore dhe regjimit kufitar në portat 1 dhe 31. Pra, mund të shpresojmë se do të kthehet një normalitet regjimi kufitar Kosovë – Serbi. Por, objektivisht ne deshëm apo jo duhet të përballemi me faktin që tema e veriut është hapur politikisht”, ka deklaruar Shala në një intervistë për Radion Evropa e Lirë.

“Ekziston segmenti i sigurisë në veri i cili është mbuluar jashtëzakonisht mirë nga KFOR-i, e shpresojmë nesër edhe nga Policia e Kosovës dhe EULEX-i, por nga ana tjetër ekziston edhe dimensioni politik. Ne tash e kemi të pashmangshëm preokupimin me temën e veriut të Kosovës. E keni parë edhe vet kanë gufuar spekulimet ditëve të fundit që opsioni i cili me gjasë ka mundësi të dalë mbi tavolinë është ai i të ashtuquajturit ‘Ahtisaari Plus’, apo një konkludim i cili del nga analiza që ndarja është jashtë opsionit, por nga ana tjetër supozohet që edhe Ahtisari është një ofertë e mangët”.

“Ne e dimë qëndrimin tonë dhe besoj që me kujtohet kur kemi biseduar edhe më parë, kur e kam thënë qartë që gjithçka që duhet për veriun është në Pakon e Ahtisaarit. Është nj ofertë kuptimplotë, është serioze dhe aty është zgjidhja për çështjen e veriut të Kosovës”, ka thënë ndër të tjera ish-koordinatori i Ekipit të Unitetit në bisedimet me Serbinë. /Telegrafi/