ROSU nuk shkeli një Jarinjë

Efektivët e Njësisë Rosu kurrë nuk kanë shkelur në Portën doganore në Jarinjë. Ishin nisur në orët e darkës të 25 korrikut për të vënë nën kontroll këtë pikë me Serbinë, por ishin bllokuar rrugës nga serbë lokalë. Kishin mbetur diku në Leposaviq.
Pastaj, pas orësh të tëra qëndrimi para një barrikade, kishin vendosur të zmbrapseshin, ndryshe nga konvoji që ishte nisur për në portën doganore në Bërnjak, ku kishte mbërritur fare lehtë, shkruan Koha Ditore.

Efektivë të kësaj njësie elite të policisë kanë treguar për gazetën sesi nuk kishin mundur t’i dërgonin forcat vetë oficerët doganorë në Jarinjë ku duhej të ndalnin kamionët me mallra komerciale që hynin nga Serbia në Kosovë.

Kjo për të zbatuar vendimin e Qeverisë së Kosovës për aplikim të masës së reciprocitetit ndaj Serbisë, sa i takon shkëmbimit kufitar të mallrave.

Autoritetet shtetërore kurrë nuk kanë treguar për dështimin. Përkundrazi, e patën kualifikuar të përmbyllur me sukses misionin e Njësisë speciale të Policisë.

Policia e Kosovës prej katër ditësh nuk u ka dhënë përgjigje pyetjeve të gazetës që ndërlidhen me këtë aksion. Tek të martën zëdhënësi i Policisë, Baki Kelani ka thënë se informatat mund të merren vetëm nga ministri i Punëve të Brendshme, Bajram Rexhepi.

E Rexhepi ka qenë fare i shkurtër. Përgjigjen, siç nuk e ka zakon, e ka dhënë nëpërmjet një “sms”.

“Për të gjitha ka pasur shpjegime dhe prononcime kryeministri, zëvendëskryeministrat dhe unë”, ka shkruar Rexhepi. “Nuk jemi të interesuar për më shumë detaje, as Policia, as Ministria e Punëve të Brendshme në përgjithësi”.

Ka qenë pikërisht Rexhepi që kishte konfirmuar përfundimin e suksesshëm të misionit të ROSU-s për të vënë nën kontroll pikat doganore G1 dhe G31, që ndodhen në Jarinjë, përkatësisht në Bërnjak.

Ai kishte konfirmuar një marrëveshje me KFOR-in “për tërheqjen e njësive speciale nga pika 1 dhe 31 në veri”. /Telegrafi/