KFOR-i ndalon ‘këshilltarët’ serbë në Jarinje?

Këshilltarët “komunal” nga Mitrovica dhe Zveçani, me urdhër të KFOR-it, nuk janë lejuar të futen në Kosovë, në pikën kufitare në Jarinje. Caslav Sofronijevic nga i ashtuquajturi Kuvend Komunal i Zveçanit, ka thënë për B92 se kontingjenti amerikan i ushtarëve kanë ndalur autobusin me të cilin udhëtonin dhe janë urdhëruar të kthehen mbrapsht.

“Këshilltarët komunalë po ktheheshin me autobus nga mbledhja që u mbajt në Beograd. Në Jarinje, kontingjenti amerikan i ushtarëve me pushkë në duar, pasi legjitimoi, shprehen pakënaqësi, as vet nuk e di për çfarë. Më pas erdhi përkthyesi dhe na tha se nuk mund të hyjmë në Kosovë, por nuk na tha arsyen. Ne pyetem se pse nuk mund të hyjë në territorin tonë, por nuk morëm asnjë përgjigje”, ka thënë Sofronijevic.

“Ne jemi drejtuar aktualisht drejt Novi Pazarit dhe do të përpiqemi të kalojmë në Bërnjak, por ndoshta do të na ndalin edhe atje. Sidoqoftë do të gjejmë rrugë alternative, madje në qoftë nevoja edhe në këmbë do të kthehemi në shtëpitë tona”, ka thënë ndër të tjera ky përfaqësues i serbëve të veriut.

Autoritetet kosovare kanë marrë vendim të mos u lejohet hyrja në Kosovë atyre autobusëve që nuk kanë leje për mbajtjen e linjave në Kosovë. Ky vendim u mor menjëherë pasi Qeveria e Kosovës vendosi embargo për mallrat nga Serbia, shtet ky i cili nuk lejon që mallrat nga Kosova të shiten dhe as të kalohen transit nëpër Serbi. /Telegrafi/