Mbrojtja: Akuza ndaj Haradinajt e bazuar në dosjet serbe

Në Gjykatën për Krime të Luftës në Hagë sot, pasdite, pritet vazhdimi i rigjykimit të pjesshëm të ish-kryeministrit të Kosovës, Ramush Haradinaj, dhe bashkëluftëtarëve të tij, Idriz Balaj dhe Lahi Brahimaj.
Ky është rigjykimi i parë në historinë 18 vjeçare të Gjykatës së Hagës.

Më 3 prill të vitit 2008 kjo gjykatë i kishte liruar nga të gjitha akuzat Haradinaj dhe Balaj, ndërsa Brahimaj ishte dënuar me 6 vjet burg.

Vendimi për rigjykim të pjesshëm ishte marrë pas kërkesës së Prokurorisë së Tribunalit për paraqitjen e dëshmive me shkrim të 14 dëshmitarëve, në vend të dëshmive gojore.

Në seancën e djeshme të rigjykimit, prokurori Paul Roxhers ka kërkuar që të dhënat dhe informacionet e librit të Bardh Hamzajt "Rrëfim për luftën dhe lirinë" të përdoren si dëshmi. Kjo është kundërshtuar nga avokati mbrojtës, Ben Emerson, i cili ka thënë se nuk mund të pranohet si provë një libër që nuk është pranuar si provë as në gjykimin e kaluar, raporton Koha.

Prokurori Roxhers ka paraqitur elementet e aktakuzës ndaj Haradinajt, Balajt e Brahimajt. Sipas aktakuzës, tre të akuzuarit ishin përfshirë në raste të rrahjes, torturimit dhe vrasjes së disa personave, gjatë luftës në Kosovë, në vitet 1998 e 1999.

Mbrojtja e Ramush Haradinajt, duke kundërshtuar akuzat e prokurorit, tha se aktakuza ndaj klientit të tij është ngritur nga dosjet e mbledhura nga shërbimi informativ serb. /Telegrafi