Kacin: S’ka dilemë “Kosovë ose BE”

Raportuesi i Parlamentit Evropian për Serbinë, Jelko Kacin, ka thënë se çështja “Kosovë ose BE” është një “dilemë e rrejshme”, sepse nga Serbia askush nuk kërkon që të pranohet Kosova si shtet që ky vend pastaj të jetë kandidat për BE.

Në një shkrim autorial për ditoren “Dnevnik” të Novi Sadit, Kacin ka thënë se nga Beogradi pritet përparimi i bisedimeve me Prishtinën, përfshirë edhe zgjidhjen për përdorimin e vulave doganore.

“Kështu do të mënjanoheshin barrierat me tregtinë me Kosovën dhe do të pamundësohej krimi i organizuar e do të thyhej korrupsioni”, ka thënë Kacin.

Ai ka shtuar se çdo bisedë me të bashkëbiseduesit serbë e nisin me pyetjen “Kosova ose BE-ja”.

“Duhet të kemi mirëkuptim për pyetje të tilla, por është joproduktive të përgjigjesh në diçka me të cilën BE momentalisht nuk po merret”. /Telegrafi/