AKR njofton Kacin me zhvillimet e fundit në Kosovë

Zëvendëskryetari i delegacionit të Parlamentit Evropian (PE) për
Evropën Juglindore, Jelko Kacin, është pritur nga ushtruesi i detyrës
së kryetarit të AKR-së, Ibrahim Makolli. Fokus i veçantë në këtë takim
iu kushtua çështjes së plotësimit të kushteve për liberalizimin e vizave
për kosovarët, si dhe zhvillimeve aktuale politike dhe ekonomike në
vend.Në këtë takim të pranishëm ishin dhe përfaqësuesit tjerë të partisë, Ibrahim Gashi dhe Myzejene Selmani.
Në njoftimin e shkurtër për media të AKR-së thuhet se Kacin u njoftua
me zhvillimet e fundit dhe rolin e AKR-së në proceset e përgjithshme në
Kosovë. Në takim thuhet se u bisedua edhe për bashkëpunimin e Aleancës
Kosova e Re si parti liberale, me partitë dhe përfaqësuesit e
liberalëve të Evropës.

Makolli e falënderoi zv/shefin e delegacionit të Parlamentit
Evropian, Jelko Kacin, për angazhimin e tij në përmirësimin gjendjes
ekonomike dhe sociale në Kosovë dhe Ballkan. /Telegrafi/