Rexhepi: Nëse jo Serbia, ne i heqim paralelët

Porosia e kancelares gjermane Angela Merkel për heqjen e strukturave paralele serbe në Kosovë është kundërshtuar nga Beogradi, por dikush në Prishtinë thotë se Kosova do të t’i largoj vetë paralelët nga ajo pjesë.

Ministri i Punëve të Brendshme, Bajram Rexhepi, ka thënë se janë të vendosur që të shpërbëjnë çdo strukturë ilegale serbe në Kosovë.

“Natyrisht që do ta bëjë”, ka thënë Rexhepi pas një vizite në stacionin e policisë në Graqanicë, transmeton "IndeksOnline".

Rexhepi përsëriti qëndrimin e Qeverisë së Kosovës se nuk ka kthim prapa në vendimet e saj për të shtrirë autoritetin në tërë territorin e Kosovës. Ai theksoi se Qeveria është e qartë në vendimin se nuk do të lejojë që në një pjesë të vendit të sundojë joligjshmëria dhe kriminaliteti.

Ndryshe, Rexhepi ka lavdëruar punën e Stacionit të policisë në Graçanicë duke theksuar se ndihet “krenar me ta dhe punën e tyre”. /Telegrafi/