Kacin: Nuk është përgjegjësi e Prishtinës t’i shpërbëjë strukturat paralele 13:02 / 27.08.2011

Ndërprerja e financimit të strukturave paralele në veriun e Kosovës, do të bëhet hap pas hapi, ka thënë për “Radio Dukagjini” raportuesi për Serbinë në parlamentin Evropian, Jelko Kacin.

Kacin ka theksuar se deklarata e presidentit serb Boris Tadic se Serbia nuk do t’i shpërbëjë strukturat paralele, është bërë vetëm për opinionin e brendshëm në Serbi.

“Mendoj se deklarata e tij ka qenë më shumë për opinionin e brendshëm, e në veçanti për liderët opozitarë të Serbisë”, ka thënë Kacin.

Ai ka theksuar se për shpërbërjen e strukturave duhet arritur një zgjidhje e jo të ndërmerren veprime të njëanshme.

“Nuk është në përgjegjësinë e Prishtinës të shpërbëjë dikë apo diçka. Është shumë më praktike dhe normale që financimi i këtyre strukturave të ndërpritet hap pas hapi”, ka thënë eurodeputeti slloven, për të shtuar se duhet gjetur zgjidhja se si të integrohen këto struktura paralele në institucionet e Republikës së Kosovës. /Telegrafi/