Në Gjermani fillon procesi kundër Arid Ukës

Shqiptari 21 vjeçar me origjinë nga Kosova, Arid Uka, sot pritet të paraqitet në një gjykatë gjermane nën akuzën për vrasjen e dy ushtarëve amerikanë në Frankfurt në mars të këtij viti dhe për tentim të vrasjes së tre ushtarëve tjerë.

“I akuzuari është sulmuesi i vetëm, i cili ishte radikalizuar nga propaganda xhihadiste në internet”, ka thënë një zëdhënës i Zyrës së prokurorit federal në Karlsrue, transmeton “Rel”.

Raportohet se i akuzuari, Arid Uka, që ka shtetësi gjermane, i ka thënë policisë se ai i kishte përcjellë dy njerëz në uniforma, në një autobus të Forcave Ajrore të Shteteve të Bashkuara, ku 16 ushtarë të paarmatosur - që sapo kishin arritur nga Londra - po përgatiteshin për udhëtim për në një bazë ajrore.

Policia tha se Arid Uka ishte i armatosur me revole, municion dhe me dy thika.

Pritet që prokurorët do t’i thonë gjykatës se Uka ishte bërë islamist para vitit 2007, kur ishte nxënës i shkollës së mesme, por se ai nuk i takonte asnjë grupi terrorist dhe se ai i kishte kontaktuar imamët nëpërmjet rrjetit social “Facebook”.

Arid Uka është i akuzuar edhe në Shtetet e Bashkuara. /Telegrafi/