Dacic: Dialogu, në dobi të kompanive serbe

Ministri serb i punëve të Brendshme, Ivica Dacic, ka thënë se në vazhdimin e bisedimeve mes Prishtinës dhe Beogradit do të insistohet që “linja administrative mes Kosovës dhe Serbisë qendrore të shndërrohet në linjë kufitare, gjë të cilën Serbia nuk duhet ta pranojë”.

Dacic ka thënë se të premten janë arritur marrëveshjet për vulat doganore, por se në vazhdim të bisedimeve qëndrojnë çështje dhe probleme më të mëdha. Ai ka shtuar se “megjithatë është mirë që me dialog të gjenden zgjidhjet për problemet konkrete në dobi të qytetarëve dhe kompanive serbe”.

I pyetur nëse është i mundur anëtarësimi i Serbis në BE bashkë me Kosovën, Dacic ka thënë se kjo është një “pyetje hipotetike dhe metafizike”. /Telegrafi/