Dacic: Ndarje, s'ka rrugë tjetër

Ministri serb i Punëve të Brendshme, Ivica Dacic, njëherësh kryetar i Partisë Socialiste të Serbisë, ka rikonfirmuar hapur qëndrimin e Beogradit për ndarjen e Kosovës.
Në një intervistë për Zëri, pasardhësi i partisë së Slobodan Miloseviciit, ka thënë se është politikani më pragmatik, që reflekton situatën reale në terren.

Ky “pragmatizëm”, sipas tij, është që serbët e Kosovës t’i bashkohen Serbisë, ndërsa pjesa tjetër sipas tij, të ndahet nga Serbia.

“Ky është mendimi im, edhe pse kjo nuk i pëlqen, as Beogradit e as Prishtinës. Por, unë jam politikan realist dhe nuk shoh tjetër zgjidhje”, ka thënë ai.

Përndryshe, siç thotë ai, kështu siç është nisur me dialog steril, “do të kalojnë vite edhe dekada dhe nuk do të arrihet asgjë”. /Telegrafi/