Serbët e veriut kundër marrëveshjes për vulat

Përfaqësuesit e komunave paralele të veriut të Kosovës, thonë se marrëveshja mes Prishtinës dhe Beogradit për vulat e Kosovës ishte gjë e “pritur”, por se ata “do të luftojnë që të mos ngjallet dogana e Kosovës në kalimet në Bërnjak dhe Jarinje”.

“Pa marrë parasysh marrëveshjet, serbët e veriut të Kosovës nuk do t’i pranojnë doganierët shqiptarë”, ka thënë për “Beta”, i ashtuquajturi kryetar i Qarkut të Mitrovicës, Redenko Nedeljkovic.

“Jam i bindur se doganierë të Kosovës nuk do të ketë në veri. Kur është fjala te vulat, ato mund të përdoren në jug të Ibrit”.

I ashtuquajturi kryetar i komunës së Leposaviqit, Branko Ninic, ka thënë se vula e doganave të Kosovës “është e papranueshme dhe se në pikat 1 dhe 31 nuk do të përdoret”. Ndërsa, i ashtuquajturi kryetar i Zubin-Potokut, Slavisa Ristic, thotë se marrëveshja e arritur në Bruksel për pranimin e vulave të Kosovës është “vulë për dorëzimin e Kosovës”.

“Edhe një tradhti”, ka thënë Ristic për “Beta”. “E ftojmë Stefanovicin që të dal para popullit dhe të shpjegojë se çka ka pranuar, e jo që populli të endet si i çmendur dhe t’i nënshtrohet rrezikut që të vritet nga ROSU”.

I ashtuquajturi kryetar i Komunës së Mitrovicës, Krstimir Pantic, ka thënë se marrëveshja është e keqe për Serbinë, “sepse Kosovën e konsiderojmë pjesë të Serbisë dhe duhet të vlejnë vulat e Serbisë”. /Telegrafi/