Thaçi falënderon gjeneralin Buhler

Kryeministri i Republikës së Kosovës, Hashim Thaçi ka pritur të mërkurën në një takim lamtumirës, komandantin e deritanishëm të KFOR-it, gjeneralin gjerman Erhard Buhler.

Me këtë rast, kryeministri Thaçi ka shprehur mirënjohjen e tij dhe të Qeverisë së Republikës së Kosovës për punën e madhe që gjenerali Buhler e ka bërë në Kosovë në kuadër të udhëheqjes së forcave të KFOR-it. Në mënyrë të veçantë, kryeministri e ka vlerësuar lartë bashkëpunimin e frytshëm që ka pasur Qeveria e Republikës së Kosovës me KFOR-in gjatë periudhës së shërbimit të gjeneralit Buhler në krye të KFOR-it.

Kryeministri Thaçi e ka vlerësuar komandantin e deritanishëm të KFOR-it, gjeneralin Buhler si mbështetësin e parezervë të sigurisë, të sundimit të rendit dhe ligjit në tërë territorin e Kosovës, mandat ky i KFOR-it, i përcaktuar edhe me dokumente ndërkombëtare.

Nga ana e tij, gjenerali Buhler ka falënderuar kryeministrin e Republikës së Kosovës për bashkëpunimin e gjithanshëm të qeverisë me KFOR-in dhe ka theksuar se ky bashkëpunim do të thellohet edhe më tej. Prioritet dhe mandat kryesor i KFOR-it është siguria e qytetarëve të Kosovës në gjithë territorin e Kosovës dhe në këtë kuadër KFOR-i do të vazhdojë ta kryejë në plotëni mandatin e vet, është shprehur gjenerali Buhler. /Telegrafi/