Sindikalistët kërkojnë dorëheqjen e Naim Tërnavës

Kryetari i Sindikatës së Punëtorëve të Bashkësisë Islame të Kosovës, imami i Xhamisë në Podujevë, Idriz Bilalli, me një sërë argumentesh ka kërkuar dorëheqjen e kryetarit të BIK-ut, Naim Tërnava.

"Shoqata Sindikale është kundër kryetarit të BIK-ut, për shkak se ai nuk ka realizuar asnjë nga premtimet e dhëna prej kur është zgjedhur në këtë post para 7 vjetësh. BIK-u, tash e 12 vjet nuk ka status të zgjidhur juridik. Përveç kësaj, kryetari aktual i BIK-ut është i ndikuar edhe nga rrymat ekstreme që veprojnë në Kosovë për interesa politike e personale", ka thënë Bilalli, transmeton koha.net.

Tërnava, duke ushtruar ndikimin e tij prej kryetari, ka përjashtuar nga Fakulteti i Studimeve Islame edhe disa profesorë dhe ka ndërhyrë në mënyrë flagrante në punët akademike të Fakultetit të Studimeve Islame. Sipas Bilallit, objektivi i Shoqatës Sindikale të Punëtorëve të BIK-ut është që të ruajë frymën tradicionale të fesë islame në Kosovë.

"Ne jemi kundër ndikimit të rrymave ekstreme, të cilat kanë synime politike dhe kamuflohen nën petkun e fesë islame. Këto rryma, që financohen nga qarqe ekstreme, kanë për qëllim përçarjen dhe zbehjen e imazhit të fesë islame në trevat tona. Ndaj edhe veprimet e tyre të fundit, siç janë protestat në rrugë etj. e kanë qitur në sipërfaqe ndikimin e drejtpërdrejtë në institucionin e BIK-ut", ka thënë Bilalli, duke shtuar se prijësit e këtyre rrymave dalin edhe si zëdhënës të BIK ut, ndërsa Tërnava hesht. /Telegrafi/