LDK: Qeveria e PDK-së tenton ta falsifikojë historinë

Lidhja Demokratike e Kosovës vlerësoi të hënën se Qeveria e PDK-së, e njohur gjerësisht për mungesë transparence, për papërgjegjshmëri e shpërdorime në të gjitha fushat, tani, tinëzisht e për interesa politike, i ka hyrë punës që të ndryshojë politikisht tekstet e historisë së popullit shqiptar.

Sipas LDK-së, edhe pse Qeveria u përpoq ta fshehë, u mësua që ajo tanimë ka nisur veprimet politike për ndryshimin e teksteve shkollore të lëndës së historisë.

“Lidhja Demokratike e Kosovës vlerëson se Qeveria nuk guxon të ndërhyjë në çështje të kësaj natyre, meqë këto nuk janë çështje të politikës së ditës e as çështje të qeverive. Tekstet shkollore burojnë nga kurrikulat dhe shkruhen nga profesionistët. Vetëm në vendet totalitare qeveria ndërhyn ose përcakton se për çfarë duhet të shkruhet në tekstet shkollore e si duhet të shkruhen ato. Çdo ndërhyrje në këtë fushë, nënkupton tendencën për të shtrembëruar të vërtetën dhe për të falsifikuar faktet”, vlerëson kjo parti.

Më tej thuhet se të gjitha diskutimet për çështje të kësaj natyre, përherë duhet të bëhen në qarqet akademike e intelektuale, sepse vetëm qarqet e tilla janë kompetente për të vlerësuar lëndën dhe gjuhën e teksteve.

Sipas LDK-së, Qeveria duhet të përkrahë këto qarqe në punën e tyre, të ndihmojë konkrektisht, së pari duke u garantuar kushte e liri në punën e tyre, e jo të marrë përsipër të bëjë keq punën që profesionistët e bëjnë mirë.

“Qeveria e cila e ka shpallur Kosovën shtet të dijes, duhet ta dijë që shtetin e tillë nuk mund ta udhëheqin njerëzit e paditur”, vlerëson LDK. /Telegrafi/