Dacic: Janë hartuar disa masa për veriun

Ministri i Punëve të Brendshme i Serbisë, Ivica Dacic ka thënë se në takimin e mbrëmshëm të përfaqësuesve të kreut shtetëror me presidentin Boris Tadic, është arritur pajtueshmëria për një sërë masash që duhet të ndërmerren, “për të shmangur pasojat e rënda dhe zgjidhjet e imponuara dhunshëm në Kosovë”.

Dacic ka sqaruar se masat janë para së gjithash të natyrës diplomatike dhe politike.

Mediat në Serbi, transmeton Evropa e Lirë njoftojnë se ministri i brendshëm serb ka thënë se “gabimisht pretendohet se Serbia është e gatshme të bëjë çmos për të fituar kandidaturën për anëtarësim në BE dhe se tani është momenti më i përshtatshëm për të ushtruar trysni mbi të, në mënyrë që të pranohet pavarësia e Kosovës”.

“Një raport i këtillë karshi Serbisë është i gabueshëm dhe i padrejtë. Hapat e njëanshëm në ndërlidhje me veriun e Kosovës mund të nxisin pasoja të rënda dhe konflikt në rajon”, ka thënë Dacic”. /Telegrafi/