INPO ia rikujton zyrtarëve parimet e demokracisë

Me rastin e Ditës Ndërkombëtare të Demokracisë organizata INPO ka realizuar një performancë me anë të së cilës i rikujton institucioneve publike dhe zyrtarëve publik për obligimin që kanë për përfshirjen e qytetarëve në vendimmarrje dhe funksionimin demokratik të institucioneve publike.

Me rastin e kësaj dite, INPO poashtu i ka dërguar një letër të gjithë zyrtarëve të lartë publik brenda Komunës së Prishtinës e cila përshkruan një historik të shkurtë të Ditës Ndërkombëtare të Demokracisë dhe përhapja e saj nëpër vendet e ndryshme të botës, përfshirë edhe Kosovën.

“Më shumë se 10 vite që nga fillimi i tranzicionit demokratik në Kosovë progres i madh është arritur, por ende mbetet shumë punë për tu bërë, në mënyrë që nga vend ‘pjesërisht i lirë’ siç përshkruhet Kosova nga organizata ‘Freedom House’, të shndërrohet në vend ‘plotësisht të lirë’”, thuhet në letër.

“Prandaj, po ju drejtohemi me këtë letër të hapur që si zyrtar publik që jeni, keni obligim para se gjithash ligjor e më pas dhe moral që të ushtroni detyrat tuaja duke respektuar parimet bazë të demokracisë: transparencën, llogaridhënien dhe gjithpërfshirjen. Institucionet publike dhe zyrtarët publik që punojnë në to janë të zgjedhur dhe të emëruar për të qenë në dispozicion të qytetarëve dhe për të ofruar shërbime sa më të mira publike për ta”, thuhet ndër të tjera. /Telegrafi/