SHBA - model i demokracisë

Republika e Kosovës është një projekt i suksesshëm i vullnetit të shprehur lirshëm dhe i ndihmës e përkrahjes ndërkombëtare, në veçanti të Shteteve të Bashkuara të Amerikës. Kështu tha të martën në mbrëmje presidentja Atifete Jahjaga me rastin e 235 vjetorit të Deklaratës së Pavarësisë së Shteteve të Bashkuara të Amerikës, në ceremoninë e organizuar nga Ambasada Amerikane në Republikën e Kosovës.

“Urimet më të përzemërta të popullit të Kosovës dhe të mijat, për Ditën e Pavarësisë së Shteteve të Bashkuara të Amerikës, të vendit që civilizimit njerëzor i dha, dhe po i jep kontributin më të rëndësishëm në zhvillim dhe në përparim, në modelin e demokracisë e veçanërisht në ruajtjen e paqes dhe të stabilitetit në botë”, tha presidentja në fjalimin e saj.

“Ne asnjëherë nuk do ta harrojmë përkrahjen e Bashkimit Evropian dhe të Shteteve të Bashkuara të Amerikës, nuk do të harrojmë intervenimin e NATO-s në vitin 1999, si një vepër humanitare që e shpëtoi popullin tim nga gjenocidi, që i ktheu në shtëpitë e veta më shumë se gjysmën e qytetarëve të shpërngulur me dhunë”.

“Republika e Kosovës është shtet i të gjithë qytetarëve të barabartë pa dallim përkatësie etnike, fetare, racore apo tjetër sepse ky është vullnet i yni dhe ky është parim i patjetërsueshëm i civilizimit dhe i kulturës evropiane, së cilës ne si popull dhe vend i përkasim. Republika e Kosovës do të bëhet anëtare e Bashkimit Evropian dhe NATO-s dhe sa më parë që kjo të ndodhë aq më mirë do të jetë për rajonin, për Evropën dhe për popullin tim. Është ky një sukses i yni i përbashkët që nuk ka alternativë, i institucioneve të vendit, i ndihmës dhe i angazhimit ndërkombëtar”, tha Jahjaga.

“Modeli amerikan në ndërtimin e vendit, në konceptin e civilizimit e të gërshetimit të kulturave, në angazhimin në politikën ndërkombëtare mbetet një inspirim dhe një përvojë e mirë për vendin tim, në ndërtimin dhe në zhvillimin në të gjitha fushat e sidomos në rolin që Republikës së Kosovës i takon në rajon dhe në politikën ndërkombëtare, duke ndërtuar raporte të mira me të gjitha vendet fqinje, duke marrë pjesë në të gjitha projektet dhe në nismat rajonale dhe globale”, tha ndër të tjera presidentja e Republikës së Kosovës. /Telegrafi/