Marrëveshjet, mbi parimet e reciprocitetit midis dy shteteve

Qeveria e Republikës së Kosovës ka bërë të ditura disa detaje të
marrëveshjeve të arritura të shtunën në kuadër të raundit të pestë të
dialogut mes Kosovës dhe Serbisë.“Marrëveshja për Lëvizjen e
lirë është e bazuar mbi parimet e reciprocitetit të plotë midis dy
shteteve, vullnetit të mirë dhe bashkëpunimit të ndërsjellë. Qëllimi i
saj kryesor është mundësimi i qarkullimit të lirë të qytetarëve dhe
automjeteve nga njëri shtet në tjetrin dhe për në vendet e treta”,
thuhet në një komunikatë të lëshuar nga Qeveria e Kosovës.
Sipas Qeverisë, marrëveshja për njohjen reciproke të diplomave
universitare është në linjë të plotë me praktikat evropiane dhe
marrëveshjeve ndërshtetërore me të cilën mundësohet njohja reciproke e
diplomave universitare midis dy vendeve duke u mundësuar studentëve nga
të dyja vendet perspektiva edukimi të mëtejmë dhe punësimi në shtetet
përkatëse.
Sa i përket marrëveshjes për kthimin e regjistrave civilë, në
njoftimin e qeverisë thuhet se kjo i kontribuon kompletimit të
regjistrit civil të Kosovës, përmes të cilit Kosova praktikisht përmbush
një prej kritereve për marrjen e liberalizimit të vizave me BE-në.
“Arritjet e shënuara në këtë raund të dialogut teknik ndikojnë në
përmirësimin e marrëdhënieve ndërfqinjësore dhe bashkëpunimet rajonale,
që janë kritere të Kopenhagës për integrim në BE”, thuhet më tej në
komunikatë.
Qeveria sqaron se marrëveshjet do të fillojnë të implementohen
menjëherë dhe BE përmes mekanizmave të tij do të jetë koordinues,
lehtësues dhe monitorues përgjatë zbatimit të tyre. Ndërsa të hënën
pritet që ndërmjetësi i dialogut teknik, Robert Cooper, t’i bëjë publike
përmbajtjet e plota të marrëveshjeve të arritura. /Telegrafi/