Qeveria politizon burgjet

Partitë politike që përbëjnë koalicionin qeverisës duket se i kanë vënë kusht vetes, që brenda këtij mandati t’i akomodojnë të gjitha aktivistët partiakë, të cilët kanë “grisur këpucët” gjatë zgjedhjeve për të siguruar sa më shumë vota.

“Infektimi” i politikës qeverisëse pas sekretarëve të përhershëm nëpër dikasteret qeverisëse, ka zënë vend edhe nëpër institucionet e pavarura shtetërore, shkruan e përditshmja Zëri.

Trendit për akomodimin e militantëve partiakë nuk i ka shpëtuar as Shërbimi Korrektues i Kosovës, në krye të të cilit është zgjedhur ish-kandidati i Partisë Demokratike të Kosovës për deputet, Ylber Topalli.

Personi, që në listën e PDK-së ishte i radhitur i nëntëdhjetedyti, e që nuk ka arritur t’i sigurojë votat për deputet është shpërblyer nga partia më e madhe në vend me pozitën e kryeinspektorit në Shërbimin Korrektues të Kosovës, institucion ky që vepron nën ombrellën e Ministrisë së Drejtësisë.

Por, akomodimi i partiakëve në këtë institucion nuk mbaron me kaq. Për këtë duket se është kujdesur ministri i Forcës dhe Sigurisë, Agim Çeku. Njëri nga ish-këshilltarët e tij, Ramë Arifaj është zgjedhur inspektor. /Telegrafi/