Konfiskohen 7.5 kg heroinë, arrestohen 6 veta

Prishtinë, 25 qershor – (e plotësuar) - Departamenti Kundër Krimit të Organizuar ka vazhduar hetimet lidhur me rastin e koduar "APAQI", që ka të bëjë me luftimin e veprave penale kundër krimit të organizuar dhe trafikimit të drogës, thuhet në njoftimin e plotësuar të Policisë së Kosovës, lidhur me rastin e kapjes së një sasie bukur të madhe të heroinës.
“Pas një hetimi dhe pune ekipore të zhvilluar në mënyrë shumë profesionale, hetuesit kanë arritur të konfiskojnë 7.5 kg substancë narkotike, që dyshohet të jetë e llojit heroinë dhe gjatë bastisjes së disa shtëpive në dy rajone (Ferizaj e Prizren) janë konfiskuar 2 615 euro, 22 fishekë të kalibrit 9 mm, si dhe 18 fishekë të kalibrit 7.65 mm.”
Policia thekson se operacioni ka qenë i menduar mirë, se janë ndaluar dy vetura për të cilat dyshohej se do të realizonin një dërgesë me substanca narkotike me destinim në shtetet e Evropës perëndimore.
Njëra nga këto vetura është konfiskuar nga ana e hetuesve, si dhe është konfiskuar edhe substanca narkotike.
Policia njofton se gjatë këtij operacioni janë arrestuar 6 (gjashtë) persona të dyshuar, pesë meshkuj dhe një femër: F. M. nga Prizreni dhe I. K., F. N., B. H., B. H. dhe Sh.H., të gjithë këta nga Ferizaj.
Pas konsultimit me Prokurorin publik, të gjithë të arrestuarve iu është shqiptuar masa e ndalimit policor, ndërkohë që është duke u përgatitur kallëzim penal ndaj këtyre të dyshuarve.