Kosova ka nevojë për gjyqësor të pavarur

Kosova ka nevojë për gjyqësor të pavarur

Gjyqtarë dhe prokurorë kanë dhënë sot betimin para presidentit në detyrë, Jakup Krasniqi, duke shënuar kështu përmbylljen e procesit të verifikimi nga ana e Komisionit të Pavarur Gjyqësor dhe Prokurorial dhe kalimin e kompetencave tek Këshilli Gjyqësor i Kosovës.
“E konsideroj ditë të rëndësishme, çast të rëndësishëm, ceremoninë e sotme, jo thjesht për të bërë një ritual zyrtar, një akt administrativ, por, para së gjithash, një akt mbushës për një sektor që paraqet ekuilibër dhe funksion shteti: aktin e betimit tuaj solemn”, tha Krasniqi.

“Nuk është në dorën time tani të mbaj leksione në lëmin për të cilin ju jeni profesionistë, po nuk e heq nga mendja faktin se E drejta, Drejtësia, është një univers vlerash që përthekon gjithë lëmenjtë e jetës shoqërore dhe, më duket kuptimplote përzgjedhja e simbolit të Peshores si shenjë identifikuese të punës suaj e të sivëllezërve tuaj gjithandej rruzullit”.

“E them me kënaqësi, se, ndihem i nderuar që sot, mund t’ju uroj, në këtë akt të betimit solemn dhe nuk kam sesi të mos e kujtoj formulën lapidare të revolucionit frëng: liberte, fraternite, egalite (liri, vëllazëri, barazi ose drejtësi). Një trinom që më shumë se kudo tjetër i bën nder dhe i duhet një shteti të ri siç është Kosova, atdheu ynë i dashur”, tha Krasniqi.

Ceremoninë, ku u bënë emërime në gjykatat në nivel komunal dhe ato për kundërvajtje, e ka përshëndetur edhe përfaqësuesi special i Bashkimit Evropian, Pieter Feith, duke u shprehur në mbështetje të krijimit të një gjyqësori të pavarur dhe profesional në Kosovë.

Feith tha se populli në Kosovë ka nevojë dhe meriton një sistem gjyqësor të pavarur dhe profesional, i cili pasqyron larminë etnike të Kosovës. Emërimet e sotme sipas tij janë një hap shumë i rëndësishëm në drejtim të arritjes së këtij qëllimi.