Erdogan përuroi xhaminë e rinovuar të Prishtinës

Prishtinë, 4 nëntor - Në kuadër të vizitës që po i bënë Kosovës, kryeministri turk, Rexhep Taip Erdogan, i shoqëruar edhe nga kryeministri në dorëheqje i Kosovës, Hashim Thaçi, sot pasdite ka qëndruar për një vizitë në Kryesinë e Bashkësisë Islame të Kosovës, ku është pritur nga Myftiu i Kosovës, Naim Tërnava me bashkëpunëtorë.
Pasi e ka falënderuar kryeministrin e Turqisë për këtë vizitë, myftiu Tërnava ka thënë se për Kosovën në përgjithësi, e për Bashkësinë Islame në veçanti, “kjo është një ditë e rëndësishme, një ditë historike, ngase sot këtu kemi për vizitë një mik dhe një mbështetës të madh të Kosovës dhe popullit të saj”.
Myftiu ka shprehur gjithashtu edhe mirënjohjen e popullit të Kosovës për popullin, qeverinë dhe vet kryeministrin turk, për kontributin që kanë dhënë për Kosovën si para, gjatë dhe pas luftës.
“Populli i Kosovës nuk e harron ndihmën, kontributin dhe angazhimin tuaj që në vazhdimësi keni dhënë për Kosovën”, ka theksuar myftiu, transmeton zyra për informim të publikut e BIK-ut.
Tërnava e ka njohur kryeministrin Erdogan edhe me historikun, organizimin dhe funksionimin e BIK-ut dhe institucioneve të tij.
Kryeministri i Turqisë ka thënë se ndien kënaqësi me të arriturat e Kosovës dhe se edhe në të ardhmen do të mbështesë Kosovën në arenën ndërkombëtare.
Erdogan është shprehur i gatshëm të investojë në restaurimin e monumenteve të trashëgimisë së periudhës osmane, të cilat, siç u shpreh ai, janë pasuri e përbashkët dhe si të tilla duhen të trajtohen në mënyrë meritore.
Pas këtij takimi, dy kryeministrat dhe myftiu Tërnava kanë përuruar xhaminë “Sulltan Mehmet – Fatih” në Prishtinë, e cila tash sa kohë ka qenë në rinovim.
Në fund, dy kryeministrat i janë drejtuar qytetarëve të tubuar me nga një fjalë të rastit, ndërsa myftiu Tërnava e ka bërë duan.