Vendimi për zgjedhje, Serbia ka analizuar pasojat

Ministri serb për Kosovën, Goran Bogdanovic, ka deklaruar se qeveria e Serbisë ka analizuar të gjitha pasojat e mundshme para marrjes së vendimit se ‘nuk ka kushte që serbët e Kosovës të marrin pjesë në zgjedhjet e 12 dhjetorit’.
Bogdanovic ka thënë për mediat serbe se autoritetet në Beograd kanë marrë parasysh “realitetin në terren, i cili është më kompleks, pasi që pozicioni i serbëve varet nga pjesa ku ata jetojnë”.

Sipas tij, zgjedhjet në Kosovë është duke i organizuar një etnitet të cilin Serbia nuk e pranon, ndërsa nga ana tjetër “ndërkombëtarët nuk u kanë dhënë këtyre zgjedhjeve çfarëdo kornize, që do të ishte e pranueshme për komunitetin serb”.

Ai ka shtuar se duke pasur parasysh dialogun e paralajmëruar mes Prishtinës dhe Beogradit, Serbia nuk dëshiron të ndërmarrë një hap, i cili “mund të kuptohet si mbështetje, ose pranim i pavarësisë së Kosovës”.