Sot vendimi për “rastin Tisa”

Gjykata e Qarkut në Prishtinë të premten pritet të shpall
aktgjykimin në “rastin Tisa”. Këtë e ka konfirmuar edhe EULEX-i përmes
zëdhënësit Kai Mueller-Berner. Ai ka thënë se gjykimi në këtë rast, ku
akuzohen tetë persona për krim të organizuar dhe trafikim me emigrantë,
ka përfunduar.Në tragjedinë e lumit Tisa, në vjeshtën e
vitit 2009 patën humbur jetën 15 persona, në mesin e tyre 7 fëmijë,
shkruan Zëri. Të përfshirë në aktakuzë janë: Fatmir Pajaziti, Shpejtim
Ademaj dhe Avni Hajdari, të cilët gjenden në paraburgim, Xhemajl Halilaj
e Blerim Ademaj, që gjenden në arrest shtëpiak, si dhe tre persona që
mbrohen në liri: Shaip Selmani, Ismail Krapi dhe Rabit Ajvazi.
Tetë personat akuzohen se kanë bashkëpunuar si grup kriminal dhe janë
marrë me trafikimin e kosovarëve, duke i dërguar ata nga Kosova për në
vende të tjera të Evropës. Personat që tashmë janë të përfshirë në
aktakuzë akuzohen se me biznesin e zhvilluar kanë marrë shuma të majme
parash. /Telegrafi/