Avokatët: Selmani dhe Krapi nuk u dënuan për rastin Tisa

Avokatët Ndue Thaçi dhe Qerim Zogaj që mbrojnë Shaip Selmani dhe
Ismail Krapi kanë reaguar ndaj mënyrës së si mediat, kanë raportuar
lidhur me vendimin e shpallur të gjykatës së Qarkut në Prishtinë, më
17.06.2011 për tragjedinë e rastit “Tisa”.Të dy avokatët
bëjnë të ditur për opinionin publik se për Shaip Selmani dhe Ismail
Krapi, me asnjë provë nuk është vërtetuar se ata ishin të involvuar në
Rastin Tisa.
Trupi gjykues i Gjykatës së Qarkut në Prishtinë, thuhet në reagim, i
ka liruar nga akuza që i ngarkonte për kryerjen e veprës penale
kontrabandim me migrantë, të akuzuarit Shaip Selmani dhe Ismail Krapi,
sepse me asnjë provë të drejtpërdrejtë apo të tërthortë, siç thonë
avokatët, nuk është vërtetuar se këta të akuzuar në çfarëdo mënyra ishin
të involvuar në Rastin Tisa.
“Përkundër vendimit të trupit gjykues për gjendjen faktike të
vërtetuar dhe lirimin e të akuzuarve nga kjo akuzë, mjetet e informimit
të shkruara dhe ato elektronike informojnë se si ndër aktorët e rastit
Tisa janë edhe të akuzuarit Shaip Selmani dhe Ismail Krapi”, thuhet në
reagim.
Të akuzuarit Shaip Selmani dhe Ismail Krapi, sqarojnë avokatët, janë
dënuar për një akuzë të dytë: për veprën penale të kryer në kundërshtim
në nenin 274 par. 4 Të Kodit penal të Kosovës: Krim i Organizuar, por
jo në lidhje me kontrabandimin e emigrantëve në rastin Tisa.
“Informimi i saktë dhe objektiv lidhur me vendimin e gjykatës në këtë
rast është i rëndësisë së veçantë”, shkruan në reagimin e dy avokatëve
mbrojtës, Ndue Thaçi dhe Qerim Zogaj.
Ndryshe, Gjykata e Qarkut në Prishtinë ka dënuar me nga tetë vite burg Shaip Selmani dhe Ismail Krapi. /Telegrafi/