Rritja e pagave si formë e fushatës elektorale

Vendimi i sotëm i kryeministrit në dorëheqje Hashim Thaçit për rritje të rrogave një pjese të punëtorëve të shërbimeve publike dhe një pjese të kategorive sociale, është vendim anti kushtetues në njërën anë dhe shpërdorim i parasë publike pa asnjë planifikim nga ana tjetër. Hashim Thaçi nuk ka të drejtë si kryeministër në dorëheqje që të marrë vendime të këtij lloji në emër të qeverisë, sepse kjo qeveri nuk ka fuqi ekzekutive në situatën në të cilën gjenden institucionet e Kosovës e aq më pak për çështje buxhetore, kur dihet se buxheti nuk mund të miratohet pa u konstituuar Kuvendi i ri Kosovës. Rrjedhimisht ky vendim i Hashim Thaçit nuk ka bazë kushtetuese, por është shkelje e rradhës që po përdoret si karrem për të fituar votat e qytetarëve të varfër të Kosovës. Në këtë mënyrë Hashim Thaçi po i anashkalon të gjitha rregullat dhe procedurat e duhura, kur dihet se për një vendim të tillë duhet që kuvendi të miratojë planin bugjetor dhe vetëm kuvendi si i tillë mund të autorizojë alokim mjetesh për vendime të tilla. Deklarata e tij se ky vendim nuk ishte vetëm premtim elektoral, bëhet pikërisht në ditën e dytë të mini-fushatës elektorale për ri-votim në tri komuna të Kosovës, me çka demaskohet në tërësi arsyeja e marrjes së këtij vendimi.



Lëvizja VETËVENDOSJE! është për rritjen e pagave të të gjitha kategorive shoqërore. Por rritja e vërtetë e pagave është atëherë kur sigurohen dhe respektohen kontratat e rregullta të çdo punonjësi civil, kur nuk u rrezikohet vend i punës për shkak të privatizimit apo përkatësisë partiake dhe kur institucionet shtetërore sigurohen se çmimet e produkteve bazë mbesin në raport reciprok me pagat, në mënyrë që të sigurohet jetesa dinjitoze e çdo punonjësi.



Lëvizja VETËVENDOSJE! këtë vendim të Hashim Thaçit e konsideron imoral, sepse në këtë mënyrë luhet me varfërinë e qytetarëve të Kosovës, të cilët mezi e lidhin muajin me muaj, pikërisht për shkak të mungesës së politikës ekonomike të ish-qeverisë, e cila e katandisi vendin në gjendjen çfarë është.