Brenda këtij viti, edhe dy pikëkalime kufitare me Maqedoninë

Shkup, 23 janar - Maqedonia ka përgatitur kornizën ligjore për hapjen e dy kalimeve kufitare me Republikën e Kosovës brenda këtij viti. Bëhet fjalë për vendkalimin kufitar ndërkombëtar Bellanoc-Stançiq dhe atij lokal Tanushë-Debëllde. Sekretari shtetëror në Ministrinë e Punëve të Jashtme të Maqedonisë, Abdulkadër Memedi ka deklaruar për mediat se Qeveria e Maqedonisë i ka propozuar palës kosovare dy marrëveshje bilaterale për dy kalimet kufitare në veçanti, prej të cilëve pret përgjigje për nënshkrimin e marrëveshjes, e cila do të përshpejtonte procedurat për hapjen e këtyre vendkalimeve kufitare. “Marrëveshja tjetër, që i kemi propozuar kolegëve në Kosovë, është marrëveshja për qarkullim të lirë lokal kufitar, që nënkupton, gjitha kalimet kufitare lokale, për të gjithë banorët që jetojnë dhe banojnë në brendi 25 kilometra rreth brezit kufitar, të cilët do të mund ta kalojnë kufirin me dokumente të veçanta”, tha Memedi. Ambasador i Republikës së Kosovës në Maqedoni, Skender Durmishi, ka thënë se Kosova vlerëson lart hapin e Qeverisë së Maqedonisë për hapjen e vendkalimeve të reja. Kjo, sipas tij, është dëshmi e realizimit të marrëveshjeve për bashkëpunim sa më intensiv mes dy shteteve.