Demokracia në Veprim denoncon parregullsitë

Prishtinë, 23 janar - Koalicioni i OJQ-ve “Demokracia në Veprim” po vazhdon vëzhgimin e procesit të rivotimit në komunën e Mitrovicës. Sipas raporteve të vëzhguesve të saj, deri në orën 18 janë evidentuar këto parregullsi: asistime të më shumë se një votuesi - 38 raste, votime të dyfishta - 6 raste, prezenca e personave të paautorizuar - 2 raste, votime familjare - 446 raste.

Sipas të dhënave të DV-ë, deri në orën 16:00 dalja në votime ka qenë rreth 21.3 për qind, apo 18 495 votues.

Pasi po afrohet koha e përmbylljes së procesit të votimit, Demokracia në Veprim u bën thirrje të gjithë komisionarëve, partive politike dhe simpatizantëve të tyre që të tregojnë pjekuri politike e qytetare, në mënyrë që proceset përmbyllëse dhe të numërimit të shkojnë në mënyrë të rregullt, thuhet në komunikatën e DV-së.