Kushtetuta e Kosovës duhet të ndryshohet

Drejtori i Institutit Ligjor për Evropën Lindore, Herbert Kupper, ekspert ligjor, veçanërisht për Kushtetutën e Kosovës, për atë që kishte ndodhur gjatë zgjedhjes së Behgjet Pacollit në postin e presidentit, në një mënyrë fajëson kryetarin e Kuvendit, Jakup Krasniqin, por edhe paqartësinë e vetë Kushtetutës.

“Zanafilla e gjithë kësaj ngjarjeje lidhet me kryetarin e parlamentit, sepse ai është personi i cili duhet të interpretojë dhe të zbatojë ligjet që janë në fuqi. Kjo ka të bëjë me Kushtetutën dhe me ligjet e tjera, kjo ka të bëjë me rendin e ditës së Kuvendit, si dhe rregulloren e brendshme të Kuvendit”, ka thënë Kupper në një intervistë për Deutsche Welle në shqip.

Sipas tij, Kushtetuta është tepër e re, dhe ka të bëjë me rastin e parë precedent, gjithashtu duhet thënë se Kushtetuta nuk është e qartë dhe se mund të thuhet edhe që mënyra sesi ka vepruar kryetari i Kuvendit nuk bie në kundërshtim me Kushtetutën.

“Shumica e trupit gjykues të Gjykatës Kushtetuese thotë se kemi me të bëjmë me një shkelje, por ka dy gjykatës të kësaj gjykate që mendojnë se gjithçka ishte konform ligjit. Pra ka mendime të ndryshme në lidhje me mënyrën se si ka vepruar kryetari i Parlamentit, pra që ajo mund të jetë edhe e pranueshme”, ka thënë ky ekspert gjerman.

Kupper ka vlerësuar se vendimi i Gjykatës Kushtetuese bën që për të ardhmen gjithçka të jetë e qartë.

Ai ka thënë se deputetët janë të detyruar të qëndrojnë në sallën e Kuvendit gjatë zgjedhjes së presidentit në bazë të Ligjit për deputetët dhe jo në bazë të Kushtetutës.

“Në rast se nuk janë të pranishëm, atëherë kemi shkelje të Ligjit për deputetët, por jo të Kushtetutës”, ka thënë Kupper.