Capussela: ICO nuk i duhet më Kosovës

Misioni i Zyrës Civile Ndërkombëtare ka mbaruar dhe se nuk është
më e dobishme për Kosovën veprimtaria e saj. Kështu mendon Andrea
Lorenzo Capussela, ish-udhëheqës i Njësisë për Ekonomi në ICO. “Mendoj
se ICO-ja e ka kryer punën e vet dhe se nuk është e dobishme më për
Kosovën. ICO duhet të largohet. Besojë se në fillim ka qenë e dobishme
duke i ndihmuar vendit në krijimin e ligjeve, por kur erdhi koha për të
pritur zbatimin e ligjeve atëherë ICO është dëshmuar e dobët”, ka thënë
Capussela në një takim miqsh të organizuar nga Klubi për Politikë të
Jashtme, transmeton KTV.
Duke folur për përgjegjësitë e ICO-së, ai ka thënë se ky institucion
është dashur të ndalë rritjen e pagave të bërë nga qeveria e Kosovës,
meqë, sipas tij, kjo gjë e ka dobësuar ekonominë kosovare. Capussela ka
folur edhe për përfshirjen e njerëzve të pushtetshëm në raste të
dyshimta.
“Kam parë raste kur personat, të cilët do t’i quanim të pushtetshëm,
janë përfshirë në transaksione që për mua janë shumë të dyshimta. Jam
ftuar të jem dëshmitar në një rast të madh të EULEX-it, po për shkak të
privilegjeve që i kam pasur nuk mund të dëshmoja”, ka thënë ai, duke mos
treguar se për cilin rast bëhet fjalë, por ka mohuar që të jetë rasti
me guvernatorin e BQK-së. Ai ka folur edhe për kontratën e autostradës,
të cilën e ka quajtur kontratë të keqe, për shkak të çmimeve të larta
dhe mundësive që ato të ndryshojnë sërish. Të keqe e ka quajtur edhe
kontratën e PTK-së me Dardafon. /Telegrafi/