Tahiri: Qeverisja komunale po rrezikohet nga politika

Mundësia për të zgjedhur kryetarët e komunave drejtpërdrejt nga qytetarët e Republikës së Kosovës përveç që e ka rritur demokracinë lokale, po ashtu, ka krijuar mundësi për efikasitet më të madh.
Megjithatë, në mungesë të një mbikëqyrje të fortë në komunat tona po rrezikohet që kryetari i komunës të shndërrohen në “Monark” dhe personalitet i paprekur përgjatë mandatit qeverisës. Kështu deklaroi Besnik Tahiri, drejtor i Institutit Kosovar pёr Qeverisje Lokale dhe anёtar i kryesisё sё AAK-sё, po merr pjesё nё tryezёn rajonale tё Shkollёs pёr Demokraci Lokale tё Ballkanit Perëndimor qё po mbahet nё Sarajevё.

“Republika e Kosovёs ka kornizё ligjore shumё tё avancuar, pasi që në të kaluarën kryetari i komunës, zgjidhej nga Kuvendi komunal dhe nuk kishte legjitimitet të fuqishëm qytetar, kurse tani pozita e kryetarit u shndërrua në figurën qendrore të ekzekutivit komunal, që zgjidhet drejtpërdrejt me votën e qytetarit. Tashmë në vendin tonë kemi mandatin e dytë të qeverisjes komunale me kompetenca të avancuara dhe bartje të vazhdueshme të kompetencave. Megjithatë, mbikëqyrja e punës së kryetarit konsiderohet të jetë një nga problemet më serioze në komuna pasi që kuvendet komunale kryesisht janë të kontrolluara nga kryetarët e komunave me koalicione dhe kalkulime politike, kurse shoqëria civile në komuna në mungesë të resurseve dhe stimulimit është relativisht e dobët. Duke qenë se mbikëqyrja është e dobët, në pushtetin lokal rrezikohet që kryetari i komunës të shndërrohet në ‘Monark’ dhe personalitet të paprekur përgjatë mandatit qeverisës. Megjithatë, reforma ligjore dhe mundësia për të zgjedhur kryetarët drejtpërdrejt nga qytetarët përveç që e ka rritur demokracinë lokale, po ashtu, ka krijuar mundësi për efikasitet më të madh në menaxhim dhe organizim të punës si dhe një llogaridhënie të qartë”, ka theksuar Tahiri. /Telegrafi/