Limaj thotë se në procesin e Haradinajt po përzihet politika

Dështim i madh është quajtur Gjykata Ndërkombëtare e Hagës në rastin
Haradinaj, në debatin për procesin e Ramush Haradinajt në emisionin e
mbrëmshëm Rubikon, të KTV-së. Ahmet Isufi nënkryetar i AAK-së, ka thënë
se rreth 7 vjet po bëhen që nga akuza e Haradinajt. Sipas tij këto vite
nuk janë fer për një lëndë të trajtuar edhe më parë. E, Fatmir Limaj
nga PDK-ja, ka thënë se në këtë çështje me Hagën po përzihet politika.
“Duhet të ndihmohet Haradinaj që të dalë e vërteta dhe kjo ndihmë për
Haradinajn është edhe interes i Kosovës”, është shprehur Limaj. Ndërsa
Rexhep Selimi nga “Vetëvendosja” ka thënë se Ramush Haradinajt i është
marrë një pjesë e pakompensueshme e jetës së tij. Këtë gjendje, avokati
Arianit Koci e ka quajtur situatë të re juridike, por që, sipas tij,
epilogu do të jetë në favor të pafajësisë së Ramush Haradinajt.