PRITET THEMELIMI I DREJTORISË PËR MBROJTJEN E DËSHMITARËVE

Në kuadër të drejtorisë së përgjithshme të Policisë së Kosovës, pritet që të themelohet drejtoria për mbrojtjen e dëshmitarëve. Zyrtarët policorë thonë se kjo drejtori do të themelohet me ndihmën e misionit të Bashkimit Evropian për sundimin e ligjit dhe të zyrës ndërlidhëse të Komisionit Evropian....
Policia e Kosovës është në fazën e përgatitjes së themelimit të drejtorisë për mbrojtjen e dëshmitarëve. Zëdhënësi i policisë së Kosovës, Baki Kelani tha për Radio ”Blue Sky” (RTK), se Policia e Kosovës ka bërë përzgjedhjen edhe të një numri të policëve të cilët kanë filluar trajnimet nga dy ekspertë të Komisionit Evropian.

”Ne jemi në fazën fillestare të krijimit të kësaj njësie, na ndihmojnë edhe ekspert të Komisionit Evropian në trajnimin e zyrtarëve pocilorë të kësaj njësie. Pra disa zyrtarë kanë kryer trajnime edhe jashtë vendit”, tha ai.

Kelani tha se e gjithë kjo nismë bazohet në ligjin për mbrojtjen e dëshmitarëve i cili është në fazën përfundimtare të hartimit dhe që pritet që së shpejti të votohet ne Kuvendin e Kosovës.

”Krijimin e kësaj njësie do ta ndihmoj edhe ligji për mbrojtjen e deshmitarëve i cili pritet që së shpejti do të kaloj në Kuvendin e Kosovës. Atëher kjo njësi do të ketë mundësinë e krijimit dhe zhvillimit të mëtutjeshëm”, tha Kelani.

Ndryshe njësia për mbrojtjen e dëshmitarëve tani për tani është duke funksionuar në kuadër të EULEX-it. Mendohet se drejtoria që do të mbrojë dëshmitarët do të këtë prej 80 deri 100 pjesëtarë të Policisë së Kosovës, të cilët do të kenë trajnime të veçanta dhe pajisje të veçanta gjatë punës së tyre.