Opozita kritikon “vizitën” e Qeverisë në Bullgari

Partitë parlamentare opozitare në vend kritikuan ashpër Qeverinë e Kosovës, e cila ditë më parë kishte shkuar në Bullgari për hartimin e Programit ekonomik për zhvillimin e vendit. Sipas këtyre partive ky veprim i Qeverisë është antipatriotik dhe nuk ka vizion për zhvillimin e vendit.
Visar Ymeri, shef i Grupit parlamentar nga Lëvizja Vetëvendosje tha se Qeveria ka shkuar në skijim në kohën kur qytetarët e këtij vendi kanë pritur që ekzekutivi t’ia fillojë punës. Ymeri tha se pas vizitës është deklaruar se ata kanë punuar, kanë caktuar prioritetet dhe kjo sipas tij tregon qartë se Qeveria paska qenë pa vizion.

Sipas tij, nëse ka pasur vizon qeveritar pse është dashur hartimi i këtij dokumenti ekonomik, apo siç u shpreh Ymeri “Nëse nuk është kështu çka ju lodhi që me shku në pushim në Bullgari”.

Edhe shefi i Grupit parlamentar të Aleancës për Ardhmërinë e Kosovës, Ardian Gjini kritikoi ashpër vizitën e Qeverisë në Bullgari për hartimin e Programit ekonomik, duke e quajtur këtë veprim antipatriotik. Ai tha se nuk ka pasur nevojë të shkohet në Bullgari për hartimin e këtij dokumenti.

Gjini vlerësoi se nuk është kundër asaj pse kanë shkuar pikërisht në Bullgari, por pse është dashur të dilet jashtë shtetit për hartimin e raportit. Sipas tij, në vend që të nxitet turizmi në Kosovë, krerët e shtetit dalin jashtë vendit, thuajse Kosova nuk vend ku mund të shkohet.

“Keni mujt me shku në Rugovë, Brezovicë, Prevallë...”, tha Gjini, duke ironizuar faktin se qeveritarët janë mësuar të qëndrojnë në hotele të kategorisë së lartë dhe kanë harruar ku kanë flejtë para do kohe.

Ndërkaq, zëvendëskryeministri Hajredin Kuçi duke u përgjigjur në këtë çështje tha se slogani “për skijime” është i mirë për studentë por jo për Kuvendin e Kosovës.

Kuçi theksoi se janë të gatshëm që planet e hartuara t’i sjellin në Kuvend për t'i diskutuar dhe plotësuar. /Telegrafi