Bie vdekshmëria perinatale në Kosovë

Të premten është prezantuar Raporti Perinatal në Kosovë për vitet 2000-2010, ku mes tjerash u theksua se në 10 vjetshin e fundit ka përmirësime sa i përket shëndetit neontal, megjithatë gjendja shëndetësore e nënave dhe fëmijëve në Kosovë vazhdon të mbetet sfidë madhore për sistemin shëndetësor kosovar.
Me këtë rast ministri i Shëndetësisë i Republikës së Kosovës, Ferid Agani, tha se shëndeti neonatal është segment mjaftë i rëndësishëm për një shoqëri.

Ndërkaq, ushtruesi i detyrës së drejtorit ekzekutiv të QKUK-së, Lulzim Emini tha se ka marrë një vendim që dy shërbimet e neontaologjisë që kanë vepruar ndaras, tash e tutje të veprojnë bashkë.

Ai tha se rezultatet e treguara deri tani lidhur me gjendjen perinatale janë shumë inkurajuese, por mbetet ende për të punuar. Sipas tij, shifrat e 10 viteve të fundit flasin se ka përmirësime të dukshme në këtë drejtim, por ende mbetet punë për të bërë.

Skënder Syla, drejtor i Zyrës së Organizatës Botërore të Shëndetësisë për Kosovë, foli në emër të OBSH-së, UNFPA-së dhe UNICEF-it.

“Gjendja shëndetësore e nënave dhe fëmijëve në Kosovë vazhdon të mbetet sfidë madhore për sistemin shëndetësor kosovar, përkundër trendit të padikskuteshëm dhe shpresëdhënëse të përmirësimit të indikatorëve kyç”, tha ai.

Shefqet Lulaj, drejtor i Klinikës Obstetrike Gjinekologjike tha se për vitin 2010 janë raportuar 27.517 lindje me 27.963 të porsalindur, prej tyre 27.646 të porsalindur të gjallë, 318 vdekje fetale dhe 216 vdekje të hershme neonatale, respektivisht 534 (19.1 promil) vdekje perinatale.

Sipas tij, vdekshmëria perinatale tregon trend të rënies krahasuar me vitet paraprake, pasi që në vitin 2000, shkalla e vdekshmërisë perinatale ka qenë 29.1 promil. /Telegrafi/