Qeveria e shtyn për më vonë Ligjin antimafia

Kosova dhe Bosnjë e Hercegovina konsiderohen si të vetmet shtete në rajon që ende nuk e kanë miratuar pakon e ligjeve antimafia. Me këto ligje, parashihet konfiskimi i pasurive të paligjshme. Pretendohet se vetëm gjatë vitit të kaluar, vlera totale e dëmit që është shkaktuar nga veprimet e mundshme korruptive në Kosovë, të ketë qenë mbi 10 milionë euro. E në këto vepra, janë të përshirë edhe politikanë të rangut të lartë.
E përditshmja Koha Ditore shkruan të dielën se Qeveria e Kosovës nuk i ka dhënë prioritet miratimit të Projektligjit për parandalimin dhe luftimin e krimit të organizuar, edhe pse kryeministri Hashim Thaçi, qysh në korrik të vitit të kaluar, e ka proklamuar inicimin e procedurës për miratimin e tij.

Në agjendën legjislative të Qeverisë, ky projektligj figuron të jetë në grup me projektligjet që më së voni do të procedohen për shqyrtim dhe miratim në Kuvendin e Kosovës. Kjo gjë parashihet të ndodhë në muajin nëntor, atëherë kur deputetëve nuk do t’u mbeten as dy muaj të plotë për ta përmbyllur punën vjetore. Në Kryesi të Kuvendit, nuk besojnë se projektligji që ndryshe njihet edhe si Projektligji antimafia, do të mund të miratohet para shkurtit apo marsit të vitit të ardhshëm. /Telegrafi/