Rexhepi: S’ka hair prej EULEX-it

Vënia e veriut të Kosovës si prioritet i EULEX-it nga shefi i këtij misioni nuk po ndodh në realitet. Misioni që udhëhiqet nga gjenerali francez Xavier De Marhnac, nuk po arrin që të instalojë sundimin e ligjit në atë pjesë të Kosovës. Përkundrazi, realiteti në pjesën më problematike të Kosovës, vetëm sa po devalvon.
Që nga koha kur Marnhac e ka vënë veriun si prioritet të parë të misionit, ai ka pranuar se nuk ka fuqi që ta kthejë stafin lokal në Gjykatën e Qarkut në veri të Mitrovicës, strukturat paralele serbe kanë uzurpuar edhe ndërtesën e Gjykatës në Zubin-Potok, shkruan Koha Ditore, ndërkaq të njëjta struktura kanë shpërndarë me të madhe tabelat e reja për automjete të lëshuara nga Serbia.

Në të gjitha rastet, misioni i BE-së nuk ka reaguar siç obligohet me mandatin që ka.

E gjithë kjo situatë, e sidomos shpërndarja e tabelave, për të cilat ai ka dhënë urdhër të konfiskohen i ka ardhur në majë të hundës ministrit të Punëve të Brendshme, Bajram Rexhepi.

“S’ka hair prej tyre, ruana Zot prej EULEX-it”, ka thënë Rexhepi. Ministri ka shpjeguar se ka kërkuar nga EULEX-i që të konfiskohen tabelat, por ka marrë përgjigje negative.

“Urdhri im është valid. Ne e dimë se kanë shpërndarë tabela, dhe ato do të konfiskohen kudo që ne kemi qasje...”, është shprehur Rexhepi.

Gazeta është munduar gjatë ditës të marrë përgjigjen për mosefikasitetin në veri nga misioni i BE-së për sundimin e ligjit, por ka qenë e pamundur. /Telegrafi/