Dialog pa ndërmjetës

Kosova dhe Serbia do të bëjnë një lëvizje historike, por jo të iniciuar nga ndërkombëtarët. Për herë të parë që nga shpallja e pavarësisë para tre vjetësh, e nga përfundimi i luftës para 12 vjetësh, të dyja vendet do të vendosin kontakt të drejtpërdrejtë pa kurrfarë ndërmjetësuesi.

Drejtori politik në Ministrinë e Jashtme të Serbisë, njëherësh përfaqësues i Beogradit në dialogun me Prishtinën, Borisllav Stefanovic, do të qëndrojë të enjten në Kosovës.

Në zyrat e Qeverisë së Kosovës, njofton Koha Ditore atë do të presë udhëheqja e ekipit kosovar në dialog, zëvendëskryeministrja Edita Tahiri, e më pas edhe zëvendëskryeministri Hajredin Kuçi.

Takimet pritet të ndodhin pas mesditës dhe në to nuk do të ketë asnjë zyrtar ndërkombëtar. Stefanovic e Tahiri do të diskutojnë zgjidhjet e mundshme për çështjet që tashmë i kanë diskutuar në Bruksel.

Vetë BE-ja mbështet kontaktet e drejtpërdrejta mes palëve, por nuk është as ideatore e as shtytëse e vizitës së Stefanovic. /Telegrafi/