Reeker në dialog

Pavarësisht zhvillimeve në Veri dhe përplasjeve mes politikanëve të Kosovës dhe Serbisë, raundi e ri i dialogut do të vazhdojë në Bruksel, më 2 shtator. Vazhdimi i këtij dialogu nuk kushtëzohet as me zbatimin e plotë të marrëveshjes së KFOR-it me palët, që nënkupton heqjen e të gjitha barrikadave në Veri.

Në këtë proces nuk ka ndryshuar as përbërja e delegacioneve. Të dyja palët do të përfaqësohen nga negociatorët e njëjtë. Edita Tahiri do të udhëheqë delegacionin e Kosovës, kurse Borislav Stefanovic do të kryesojë sërish delegacionin serb.

Me gjithë pakënaqësinë e Prishtinës me sjelljen e negociatorit serb, që shëtiste nga një barrikadë në tjetrën gjatë rebelimit të serbëve në Veri dhe inkurajonte ata të mos lëshojnë pe, pozita e tij si udhëheqës i bisedimeve në emër të Serbisë nuk ka lëvizur.

As në kampin e ndërmjetësve të Bashkimit Europian nuk është njoftuar për ndonjë ndryshim. Këshilltari i Baroneshës Ashton, britaniku Robert Cooper vazhdon të jetë lehtësues i dialogut. Pranë tij, do të jetë i ulur edhe Pierre Mirel, drejtor për Zgjerim në Komisionin Europian, Përfaqësuesi i BE’së në Prishtinë, Fernando Gentilini, si dhe një diplomate e BE-së nga Greqia.

Sipas ditores “Express”, Qeveria e SHBA-së në takimin e 2 shtatorit do të përfaqësohet nga diplomati Philip Reeker. Në këtë proces, më herët ka qenë i përfshirë Thomas Countryman, por ky është nominuar në një post tjetër nga Presidenti Obama.

Në prononcimin e parë publik në Kosovë, Reeker ka hedhur poshtë spekulimet për status special për veriun si dhe për ndarje të Kosovës. Ndërsa në Beograd ka kërkuar që Serbia të pranojë vulat doganore të Kosovës dhe të mos pengojë pjesëmarrësve të institucioneve kosovare në takime ndërkombëtare.

Temat e planifikuar për raundin e ardhshëm në Bruksel përfshijnë vulat doganore, telekomunikacionin, energjinë elektrike, kadastrat, bashkëpunimin rajonal si dhe eliminimin e pengesave që po i bën Serbia ndaj pjesëmarrjes së Kosovës në disa takime rajonale /Telegrafi/