FDH: Komuniteti rom, shkali dhe egjiptian ndihet i rrezikuar

Fondi për të Drejtën Humanitare në Kosovë shpreh shqetësimin për
sigurinë e banorëve të komunitetit rom, ashkali dhe egjiptian që jetojnë
në banesën kolektive numër 1 në Plemetin, komuna e Obiliqit.
Gjatë
hulumtimeve në terren nga banorët e komunitetit rom, ashkali dhe
egjiptian është lënë të kuptohet se gjendja e sigurisë së tyre nuk është
e mirë.
Banorët e këtij komuniteti në vazhdimësi kanë ngritur
çështjen e sigurisë, por kërkesat e tyre kanë hasur në vesh të shurdhër.
“Kërkesat i janë dërguar institucioneve të Kosovës në lidhje me
sigurinë tonë. Ato nuk janë dëgjuar fare apo vetëm janë përgjigjur në
mënyrë sipërfaqësore, duke bartur përgjegjësinë nga njëri institucion në
tjetrin”, tha Bajrush Berisha, përfaqësues i këtij komuniteti, duke
shtuar se “38 familje me 238 banorë gjithsej janë të rrezikuar nga
zjarret që kanë ndodhur tri herë deri më tani, kurse mungesa e ujit mund
të shkaktojë sëmundje tek banorët tanë”, tha ai, transmeton komunikata e
Fondit për të Drejtën Humanitare në Prishtinë.
Fondi dëshiron të
rikujtojë institucionet e Kosovës se më 31 dhjetor 2010 kulmi dhe kati i
gjashtë i kësaj ndërtese janë kapluar nga zjarri dhe asnjë hetim deri
më tani nuk ka dhënë rezultate sa i përket shkaqeve të këtij zjarri.
Andaj, Fondi shpreh indinjatën e thellë për kushtet e sigurisë së këtij
komuniteti të margjinalizuar dhe fton autoritet lokale e ato qendrore që
të ndërmarrin masat e nevojshme, në mënyrë që kjo gjendje apatie të
ndryshojë dhe t’i krijohen kushte të dinjitetshme për jetesë komunitetit
rom, ashkali dhe egjiptian.