Edhe 11 nxënës të Kamenicës me infeksion të rritur tuberkular

Shefi i Dispanserisë së mushkërive në Gjilan, Elez Elezi ka thënë të
premten se 11 nxënës kanë dalë të infektuar me virusin e TBC-së, nga 23
nxënës, sa i janë nënshtruar analizave përkatëse. “Pas analizës së
testit tuberkulinik, 11 nxënës kanë dalë me infeksion të rritur, të
cilët duhet t'i nënshtrohen analizave plotësuese për verifikimin e
sëmundjes së TBC-së, për të konstatuar se a janë të sëmurë nga TBC-ja
apo ende janë në stadin e infeksionit. Ai ka shtuar se tashmë janë katër
të sëmurë me TBC, njëri është i shtrirë në Dispanserinë e mushkërive në
Gjilan, ndërsa tre të tjerë janë duke marrë trajtim ambulantor në
shtëpi. Elezi ka thënë se katër nxënësit me TBC nuk guxojnë në asnjë
mënyrë të shkojnë në shkollë, sepse mund ta përhapin sëmundjen te
nxënësit tjerë.
Mostrat e analizës së dy arsimtarëve kanë dalë në
rregull, deri një arsimtare nuk ka bërë analiza, ka thënë Elezi. Ai po
ashtu ka bërë të ditur se në një familje gjithsej pesë persona janë të
infektuar dhe duhet të paraqiten në Dispanserinë e mushkërive në Gjilan
për t'i bërë analizat. Elezi ka përsëritur se nxënësit janë sëmurë nga
TBC-ja prej njërit nga nxënësit, i cili nuk dihet se ku e ka marrë
TBC-në. Mirëpo, nuk përjashtohet mundësia që infeksioni te njëri nga
nxënësit të jetë që nga fëmijëria dhe tashti është shndërruar në TBC.
Një
zyrtar i drejtorisë komunale të Arsimit në Kamenicë ka deklaruar se një
nga nxënësit e sëmurë me TBC është banues në objektin e banimit
kolektiv në qytet, ku kushtet higjienike-sanitare nuk janë të mira.
Kryetari i Kamenicës, Shaip Surdulli ka thënë se familjeve të strehuara
dhunshëm dhe pa asnjë dokument apo vendim komunal, që nga viti 1999, u
është thënë që të kthehen në shtëpitë e tyre, sepse Komuna as ka buxhet
dhe as pritet që në një kohë të afërt të rregullohet kjo ndërtesë e
papërfunduar.