Hoxhaj për hapa të shpejtë në proceset integruese

Ministri i Punëve të Jashtme i Republikës së Kosovës, Enver
Hoxhaj, zhvilloi një takim me përfaqësuesin e posaçëm të Bashkimit
Evropian në Kosovë, Fernando Gentilini.Gjatë takimit u
bisedua për perspektivën evropiane të Republikës së Kosovës dhe
bashkërendimin e aktiviteteve mes institucioneve, në plotësimin e
kritereve të agjendës evropiane, liberalizimin e vizave dhe integrimin e
Kosovës në BE.
Ministri Hoxhaj ka falënderuar përfaqësuesin e posaçëm të BE-së për
kontributin e tij të mëhershëm për Kosovën, duke shprehur besim në
vazhdimin e përkrahjes së gjithanshme të Gentilinit, për proceset që e
presin Kosovën në rrugën drejt integrimit në Bashkimin Evropian.
Hoxhaj ka shprehur përkushtimin e plotë të institucioneve të Kosovës,
që në bashkëpunim me institucionet e BE-së dhe shtetet mike, të bëhen
hapa të shpejtë në avancimin e Kosovës në proceset integruese, duke iu
referuar faktit se integrimi evropian është aspiratë dhe përcaktim i
kamotshëm i qytetarëve të Kosovës. /Telegrafi/